Саволлар ва жавоблар

Мавзу: Омад тилаш мумкинми? 19.12.2017

Савол:

Ассалому алайкум. Саволим шуки, “омад тилайман”, “омадинг бор экан”, дейилади. Умуман, бир-бирига омад тилаш мумкинми?

Ижтимоий масалалар 4059

Жавоб:

Ва алайкум ассалом. “Омад” сўзи “бахт-саодат” маъносини англатади. Яъни, кимнинг бахти бўлса, омади келади. Буларнинг ҳаммаси тақдирда ёзилган. Кимнинг бахтли, ё бахтсиз бўлиши тақдир қилинган. Аллоҳ банда келажакда нима амал қилишини билади. Лекин тақдир мажбурлаш эмас. Чунончи, банданинг тақдири ёзилганига шубҳасиз имон келтирамиз. Аммо, шу билан бирга, яхшилик касб қилишга, бахт-саодатга эришишга ҳаракат қиламиз. Қуръони карим оятлари ва ҳадиси шарифларда саодат сўраш, тинчлик-саломатлик, хотиржамлик сўраш жоизлиги айтилган. Бундан маълум бўладики, кишилар бир-бирларига бахт-саодат сўрашлари жоиз. Омад ҳам шундай, “омадингни берсин”, деганда, Аллоҳ ишингни осон ва баракали қилсин, натижасини хайрли қилсин, маъноси назарда тутилади.

Мусулмон банда омад тилаш билан бирга Аллоҳ бандалар тақдирини ёзиб қўйганига шак-шубҳасиз ишониши керак. “Тақдиримни ўзим белгилайман”, “ҳаммаси ўз қўлимда” дейиш нотўғри. Демак, тақдирга имон келтирган ҳолда дунёда ҳам, охиратда ҳам бахту саодатга ҳаракат қилинади. Валлоҳу аълам!